«««

textes de
Jamyn

«««

dispo­si­tion du
pré­am­bule
([vers 1 à 5] X 6)

»»»

«««

»»»

«««

»»»

L’esté sera l’hyuer & le printems l’Autonne,
L’air deuiendra pezant, le plomb sera leger:
On verra les poissons dedans l’air voyager
Et des muets qu’ilz sont auoir la voix fort bonne.
Leau deuiendra le feu, le feu deuiendra l’eau
Plustost que ie sois pris dvn autre amour nouueau.

Le mal donnera ioïe, & l’aize des tristesses.
La nege sera noire, & le lieure hardi,
Le lion deuiendra du sang acouardi,
La terre n’aura point d’herbes ny de richesses
Les rochers de soimesme auront vn mouuement
Plustost qu’en mon amour il y ait changement.

Le loup & la brebis seront en mesme estable
Enfermés sans soupçon d’aucune inimitié:
L’aigle auec la colombe aura de lamitié
Et le chameleon ne sera point muable:
Nul oyseau ne fera son nid au renouueau
Plustost que ie sois pris d’vn autre amour nouueau.

La Lune qui parfaict en vn mois sa carriere
La fera en trente ans au lieu de trente iours
Saturne qui acheue aueq trente ans son cours
Se verra plus leger que la lune legere:
Le iour sera la nuit la nuit sera le iour
Plustost que ie m’enflame au feu d’vn autre amour.

Les ans ne changeront le poil ni la coutume,
Les sens & la raison demeureront en paix
Et plus plaisans seront les malheureux succés
Que les plaisirs du monde au cœur qui s’en alume.
On haïra la vie aimant mieux le mourir
Plustost que lon me voie a autre amour courir

On ne verra loger au monde lesperance.
Le faux d’auec le vrai ne se discernera:
La fortune en ses ieux changeante ne sera,
Tous les effects de Mars seront sans violance,
Le Soleil sera noir, visible sera Dieu
Plustost que ie sois veu captif en autre lieu.

stances

→ texte
moder­nisé

pleine page

œuvres de
Jamyn
dispo­nibles
sur Gallica

télé­charger
le texte

Version de 1879 en ligne le 03/10/10,
remplacée par celle de 1584 le 17/01/22.
Dernièrave;re révision le 06/06/23.