Jean de LA JESSÉE (1551-?)
Que toutes nos forêts…
Anvers, Christofle Plantin, 1583.

Qve toutes noz foretz à ce iourd’huy blondoyent
De mainte belle orange, & citron meurissant :
Que toute Arabe odeur soit noz champz remplissant,
Qu’en blez couuers d’espicz noz campaignes iaunoyent.

Que de lait sauoureus noz riuages ondoyent,
Des vieus Chesnes suäntz soit le rous miel issant,
Renaisse vn gay Printempz noz prez embellissant :
Brief que plaines, & vaus, pleins de manne rosoyent.

Pleuuent les Cieus benins des parfums, & des fleurs,
Tiennent leurs bras oysifz les borgnes Marteleurs,
Dorme calme la Mer, Æol ses Ventz enserre.

Puis qu’auec ce beau iour on void naistre icy bas
Ce noble enfant Royal, qui doit en grand soulas
Seruir d’espoir au Ciel, d’ornement sur la terre !

On peut cliquer sur certains mots pour voir les épithètes de Maurice de La Porte
 
 

Qve toutes noz foretz à ce iourd’huy blondoyent
De mainte belle orange, & citron meuriſſant :
Que toute Arabe odeur ſoit noz champz rempliſſant,
Qu’en blez couuers d’eſpicz noz campaignes iaunoyent.

Que de lait ſauoureus noz riuages ondoyent,
Des vieus Cheſnes ſuäntz ſoit le rous miel iſſant,
Renaiſſe vn gay Printempz noz prez embelliſſant :
Brief que plaines, & vaus, pleins de manne roſoyent.

Pleuuent les Cieus benins des parfums, & des fleurs,
Tiennent leurs bras oyſifz les borgnes Marteleurs,
Dorme calme la Mer, Æol ſes Ventz enſerre.

Puis qu’auec ce beau iour on void naiſtre icy bas
Ce noble enfant Royal, qui doit en grand ſoulas
Seruir d’eſpoir au Ciel, d’ornement ſur la terre !

 

En ligne le 07/03/14.
Dernière révision le 25/02/24.