Amadis JAMYN (v. 1540-1593)
L’été sera l’hiver…
1584 [Œuvres poétiques, Paris, Léon Willem, 1879].

Lesté sera l’hyuer et le printemps l’autonne,
L’air deuiendra pezant, le plomb sera leger :
On verra les poissons dedans l’air voyager
Et de muets qu’ils sont auoir la voix fort bonne.
L’eau deuiendra le feu, le feu deuiendra l’eau
Plustost que ie sois pris d’vn autre amour nouueau.

Le mal donnera ioye, et l’aize des tristesses!
La nege sera noire, et le lieure hardi,
Le lion deuiendra du sang acouardi,
La terre n’aura point d’herbes ni de richesses ;
Les rochers de soy-mesme auront vn mouuement
Plustost qu’en mon amour il y ait changement.

Le loup et la brebis seront en mesme estable
Enfermés sans soupçon d’aucune inimitié :
L’aigle auec la colombe aura de l’amitié
Et le chameleon ne sera point muable :
Nul oyseau ne fera son nid au renouueau
Plustost que ie sois pris d’vn autre amour nouueau.

La Lune qui parfaict en vn mois sa carriere
La fera en trente ans au lieu de trente iours ;
Saturne qui acheue aueq trente ans son cours
Se verra plus leger que la Lune legere :
Le iour sera la nuit, la nuit sera le iour
Plustost que ie m’enflame au feu d’vn autre amour.

Les ans ne changeront le poil ni la coutume,
Les sens et la raison demeureront en paix,
Et plus plaisans seront les malheureux succès
Que les plaisirs du monde au cœur qui s’en alume.
On haïra la vie, aimant mieux le mourir
Plustost que l’on me voie à autre amour courir.

On ne verra loger au monde l’esperance ;
Le faux d’auec le vrai ne se discernera,
La fortune en ses dons changeante ne sera,
Tous les effects de Mars seront sans violence,
Le Soleil sera noir, visible sera Dieu
Plustost que ie sois veu captif en autre lieu.

On peut cliquer sur certains mots pour voir les épithètes de Maurice de La Porte
 
 

Lesté sera l’hyuer et le printemps l’autonne,
L’air deuiendra pezant, le plomb sera leger :
On verra les poissons dedans l’air voyager
Et de muets qu’ils sont avoir la voix fort bonne.
L’eau deuiendra le feu, le feu deuiendra l’eau
Plustost que ie sois pris d’vn autre amour nouueau.

Le mal donnera ioye, et l’aize des tristesses!
La nege sera noire, et le lieure hardi,
Le lion deuiendra du sang acouardi,
La terre n’aura point d’herbes ni de richesses ;
Les rochers de soy-mesme auront vn mouuement
Plustost qu’en mon amour il y ait changement.

Le loup et la brebis seront en mesme estable
Enfermés sans soupçon d’aucune inimitié :
L’aigle auec la colombe aura de l’amitié
Et le chameleon ne sera point muable :
Nul oyseau ne fera son nid au renouueau
Plustost que ie sois pris d’vn autre amour nouueau.

La Lune qui parfaict en vn mois sa carriere
La fera en trente ans au lieu de trente iours ;
Saturne qui acheue aueq trente ans son cours
Se verra plus leger que la Lune legere :
Le iour sera la nuit, la nuit sera le iour
Plustost que ie m’enflame au feu d’vn autre amour.

Les ans ne changeront le poil ni la coutume,
Les sens et la raison demeureront en paix,
Et plus plaisans seront les malheureux succès
Que les plaisirs du monde au cœur qui s’en alume.
On haïra la vie, aimant mieux le mourir
Plustost que l’on me voie à autre amour courir.

On ne verra loger au monde l’esperance ;
Le faux d’auec le vrai ne se discernera,
La fortune en ses dons changeante ne sera,
Tous les effects de Mars seront sans violence,
Le Soleil sera noir, visible sera Dieu
Plustost que ie sois veu captif en autre lieu.

 

En ligne le 03/10/10.
Dernière révision le 21/09/21.