«««

textes de
Phi­lieul

»»»

«««

»»»

Deuers l’Aurore, ou si doulcement l’souffle de ventaure
Au nouueau temps faict esmouuoir les fleurs,
Et oiselletz accommencent leurs uers,
Ie sens trestous les soucis de mon ame
Se rendre à celle, ou gist toute leur force:
Dont il conuient retourner à mes nottes.

Feisse ie tant par mes souefues nottes,
Que les souspirs peussent adoulcir l’aure,
Tant que raison luy feist ce qui m’est force,
Mais en hiuer plus tost naistront les fleurs,
Qu’amour fleurisse en celle gentile ame,
Qui ne s’en chault de rithmes ne de uers,

Mon Dieu que i’ay des larmes & des uers
Desia espars? & en combien de nottes
Ay ie essayé d’humilier celle ame,
Qui plus dure est qu’un grand rocher à l’aure?
L’aure qui bien esmeut rameaux & fleurs,
Mais esmouuoir ne peult plus grande force.

Amour souloit un temps uaincre par force
Hommes & dieux, comme on lit par maintz uers,
Et ie l’apprins sur les premieres fleurs.
Mais maintenant ny amour, ne ses nottes,
Ne pleurs, ne cris peuuent faire que l’aure
Tire ou de uie, ou de peine mon ame.

Donc au besoing o ma miserable ame,
Assemble tous tes engins & ta force,
Tandis que i’ay de uie encores l’aure,
On peult tout faire, ainsi qu’on dict, par uers,
Soit enchanter les Aspics auec nottes,
Soit exorner d’hyuer le glas de fleurs.

Par tous les champs rient herbes & fleurs:
Dont ne crois point que celle angelique ame
N’oye le son des amoureuses nottes.
Mais si fortune inique ha plus grand force,
Irons pleurant & en chantant ce uers:
Qu’auec un bœuf boiteux on chasse l’aure.

Ie prens aux rhetz l’aure, & au glas les fleurs,
En uers ie tente une sourde & dure ame,
Qui rien ne craint force d’amour ne nottes.

Sex­tine

→ texte
moder­nisé

pleine page

œuvres de
Phi­lieul
dispo­nibles
sur Gallica

télé­charger
le texte

En ligne le 14/04/24.
Dernière révision le 17/04/24.