Tigre. Felon, hyr­ca­nien, mou­che­té, in­hu­main, ra­uis­sant, fier, viste, affa­mé, fu­rieus ou fu­ri­bond, ta­che­té, cruel, ef­froiable, vio­lent, en­den­té, affreus, ha­bile, gri­ue­lé, in­dien, le­ger, sau­uage, aspre, en­ra­gé, de­uo­rant, escu­meus, fa­rouche, auide, ireus, affri­cain. Le dim. Ti­greau.

Le Tigre vient en Hyr­ca­nie & Indie. C’est vn ani­mal fort à craindre à cause de sa grande vis­tesse, de laquelle on s’apper­çoit assez quand on lui oste ses petis. Car ceux les­quels i chassent em­portent ordi­nai­re­ment toute la lit­tee, qui est tous­iours en bon nombre, & s’enfuient à bride aua­lee auec le plus viste che­ual qu’ils peuuent ren­con­trer, & mesmes ont che­ual de relais pour deslo­ger en plus grande dili­gence. Mais quand la Ti­gresse retourne (car le masle ne tient conte des pe­tis) & qu’elle trouue sa taniere vuide, elle court roide comme le vent apres ses petis, sui­uant ceux qui les em­portent à la piste. Les­quels sen­tans la Ti­gresse appro­cher par le bruit qu’elle meine, lui iettent bas vn de ses petis, lequel elle prend auec la gueulle & le rap­porte à sa ta­niere auec vne vis­tesse incre­dible, quelque pe­sant qu’il soit: puis re­tourne à la queste de ses autres petis, pour­sui­uant tous­iours ses faons iusques à ce qu’elle voit qu’il n’i a plus d’ordre, & que ceux qui les em­portent se sont embar­quez. Alors c’est grand’ hi­deur de la voir enra­ger sur la graue, pour la perte de ses petis. Tigre est prins pour le mas­cu­lin & fe­mi­nin.

Maurice de LA PORTE, Les Epithetes, 1571,
f° 262r°v° [Gallica, NUMM650715, PDF_530_531]
(texte original).

[Fils d’vn tigre. Amour.]

[Tygrine [+tigrine}. Cruau­té, fu­reur, ri­gueur.]

[Voir aussi leo­pard, lion, loup, louue, lynce, once, ours, ourse.]