«««

textes de
La Jessée

»»»

«««

»»»

«««

Et des plus beaus cheueus qu’Amour sçauroit eslire,
Pour surprendre noz cœurs dans leurs filetz retors:
Et du front le plus beau monstrant mille tresors,
Ains l’honneur de ce Dieu, son siege, & son Empire.

Et des yeus les plus beaus qu’on vid iamais reluire,
Pour attraire, & forçer, les moins dous, & plus fors:
Et du sein le plus beau qui repousse au dehors
Vn double mont poly d’Albastre, ou de Porphire.

Et des plus belles mains qui pourroyent arrester
Quelque Turc, ou Gelon: Amour me vint donter,
Aussi tost que ie vy ma Dame si acorte.

Mesme à fin d’agrandir son pouuoir sur-humain,
Depuis ce tempz il veut qu’empraintz au cœur ie porte
Son poil, son front, son œil, sa poitrine, & sa main.

Son­net

→ texte
moder­nisé

pleine page

œuvres de
La Jessée
dispo­nibles
sur Gallica

télé­charger
le texte

→ recol­lec­tion

En ligne le 19/09/22.
Dernière révision le 19/09/22.