QVi contera les fleurs de la saison nouuelle,
Ou du ciel azuré les célestes flambeaux,

Qui contera la bande écaillée des eaux,
Ou celle qui en l’air se soutient de son æle.

Qui contera les grains d’vne cueillette belle,
Le feuillage des bois, les fruitages nouueaux,
Le surjon plus fertil des Indiens ioyaux,
Ou le nombre infini de la race immortelle.

Qui contera le poil des hommes plus chenus,
Somme qui contera les atomes menus,
Et le brillant sablon du lybique riuage :

Celui là contera tant & tant de beautez
Qu’on voit reluire en vous, en vous de tous costez
Qui estes l’ornement & gloire de notre age.

Qui contera les fleurs de la saison nouuelle,
Ou du ciel azuré les rayonnans flambeaux,
Ou du grand Ocean les écaillez troupeaux,
Ou la bande qu’en l’air se soustient de son aile:

Qui contera les grains d’vne cueillette belle,
Ou des chans Auuergnacs les Vaches & les veaux,
Ou des loyaux amans les langoureux trauaux,
Ou ceux que de tout temps vsuriers on appelle.

Qui contera le poil des hommes bien chenus,
Ou subtil contera les Atomes menus,
Ou le brillant sablon du Lybique riuage.

Somme qui contera les Amours de Cypris,
Ou des Dames qui ont l’esprit aussi volage,
Celuy pourra conter mes amoureux soucis.