Étienne PASQUIER (1529-1615)
Paris, Vincent Sertenas, 1555, ff. 24v°-25r° [←Gallica].

O nuits, non nuits, ains iournaliere peine,
O iours, non iours, ains tenebreuses nuits,
O vie en dueil eschangée & ennuis,
O triste dueil, non plus dueil, mort certaine,

O cœur, ains roch d’esperance incertaine,
Ou de mon mal tous les flots sont reduits,
O yeux, ainçois de riuiere conduits,
O pleurs, non pleurs, ains coulante fontaine,

O cieux, non cieux, ains Chaos & meslange,
O dieux ducteurs de ma fortune estrange,
O dame en qui tout le cruel se cache,

O nuits, iour, vie, ô dueil, ô cœur, ô yeux,
O pleurs, ô cieux, ô dame, & ô vous dieux,
N’auray-ie donc iamais en vous relasche?



Ô nuits, non nuits… (1610)
La Jeunesse, et sa suite, Jeux poétiques, I, Loyauté,
Paris, Jean Petit-pas, 1610, sonnet LX, p. 388 [←Gallica].

O nuicts, non nuicts, ains iournaliere peine,
O iours, non iours, ains tenebreuses nuis,
O vie en dueil eschangee & ennuis,
O triste dueil, non dueil, ains mort soudaine.

O cœur, ains roch d’esperance incertaine,
Où de mon mal tous les floz sont reduits,
O yeux, ainçois de riuiere conduits,
O pleurs, non pleurs, ains coulante fontaine,

O cieux, non cieux, ains meslange & chaos,
O Dieux, non Dieux, ains guidons de mes maux,
O dame en qui tout le cruel se cache!

O nuicts, iour, vie, ô dueil, ô cœur, ô yeux,
O pleurs, ô cieux, ô dame, & ô vous Dieux,
N’auray-ie doncq’ iamais en vous relasche?



textes modernisés
[R]

 

En ligne le 08/10/16.
Dernière révision le 09/03/21.